හැලොවීන් සැමරීමට අභ්‍යවකාශයෙන් ආ මිනිස් හිස්කබල

හැලොවීන් යනු එංගලන්තය හා අයර්ලන්තය වැනි රටවල බිහිවී පසු කලෙක ලෝකය පුරාම ජනප්‍රිය වුණු, මෑත කලකදී පෙරදිග රටවලටද ව්‍යාප්ත වුණු උත්සවයකි. කෙල්ටික (Celtic) රටවල අස්වනු නෙලීමේදී පැවැත්වුණු උත්සව පසු කලෙක ක්‍රිස්තියානිකරණය වීමෙන් හැලොවීන් උත්සවය බිහිවන්නට ඇතැයි සැලකේ. සෑම වසරකම ඔක්තෝබර් මස 31 වනදා පැවැත්වෙන මෙම උත්සවය සැමරෙන්නේ මිනිසුන් බොහෝවිට භූත අවතාර, රාක්ෂයින්, සොම්බීස් වැනි භයංකර චරිත ආකාරයට වෙස්වළා ගැනීමෙන් සහ ඒ ආශ්‍රිත නිර්මාණයන් ප්‍රදර්ශනය කිරීමෙනි. ඒ හැර වර්තමානයේදී කාටූන් චරිත, සුපිරි වීර චරිත ආදියද මෙම වෙස්වළා ගැනීම් අතර බහුලව දැකිය හැකිය.

කෙසේ හෝ පසුගිය සෙනසුරාදා පැවැත්වුණු මෙවර හැලොවීන් උත්සවයට පිටසක්වළින් පැමිණි අමුත්තෙක්ද එක් වූයේය!

෴2015 TB145 ග්‍රහකය෴

එය වෙන කිසිවක් නොව බැලූ බැල්මට මිනිස් හිස්කබලක් ලෙස දිස්වන ග්‍රහකයකි. 2015 TB145 යනුවෙන් නම් කෙරුණු මෙම යෝධ ආකාශ වස්තුව හැලොවීන් දිනයේ ශ්‍රී ලංකා වේලාවෙන් රාත්‍රී දහයට පමණ පෘථිවිය ආසන්නයෙන් ගමන් කළේය. 

2015 TB145 මුලින්ම දුරේක්ෂවලට හසුකරගනු ලබන්නේ මෙම වසරේම ඔක්තෝබර් මස 10 වනදා ය. ඒ හවායි විශ්ව විද්‍යාලයේ පර්යේෂණ කටයුතුවල නිරත වී සිටින විද්‍යාඥයන් පිරිසක් විසිනි. ඉන්පසුව පුවෙටෝ රිකෝහි පිහිටි එක්සත් ජනපද ජාතික විද්‍යා පදනමට අයත් Arecibo නිරීක්ෂණාගාරය මගින් මෙහි පළමු රේඩාර් ඡායාරූප ලබාගන්නා ලදී. 2015 TB145හි එක් පසෙක ස්වරෑපය ආලෝකය හමුවේ මිනිස් හිස්කබලක ආකාරයට දිස්වන බව දක්නට ලැබුණේ මේ රේඩාර් ඡායාරූපවලිනි. 

මීටර් 600ක පමණ විෂ්කම්භයකින් හා ආසන්න ගෝලාකාර හැඩයකින් යුතු 2015 TB145 සෑම පැය පහකටම වරක් තමා වටා භ්‍රමණය වෙයි. එමෙන්ම දැනට සොයාගෙන ඇති ආකාරයට මෙය මියගිය වල්ගා තරුවකි. 

2015 TB145 හි රේඩාර් ඡායාරූප යොදාගෙන නිර්මාණය කළ චලන චිත්‍රයක් පහත දැක්වේ. 

Credits - Arecibo/ NSF

මෙවර පෘථිවියට ඉතාමත් ආසන්නයෙන් හෙවත් කිලෝමීටර 486,000ක පමණ දුරකින් ගමන් කළ මේ ග්‍රහකය නැවත පෘථිවියට සමීප වන්නේ තවත් අවුරුදු තුනකට පසු 2018 වසරේ සැප්තැම්බර් මාසයේදී ය. එහෙත් එහිදී පෘථිවිය හා 2015 TB145 අතර පරතරය කිලෝමීටර මිලියන 38ක පමණ දැවැන්ත අගයක් ගනු ඇත. එමෙන්ම දැනට සිදුකර ඇති නිරීක්ෂණ කටයුතුවලට අනුව නැවත වර්ෂ 2027 දක්වා කිසිදු ආකාශ වස්තුවක් පෘථිවියට මෙතරම් ආසන්නයෙන් ගමන් කරන්නේ නැත.

මියගිය වල්ගා තරුවක් මියගිය මිනිසෙකුගේ හිස්කබලක් ලෙස දර්ශනය වීමත්, එය හැලොවීන් දිනයේදීම පෘථිවිය අසලින්ම ගමන් කිරීමත් චමත්කාරජනක අහඹු සිදුවීම් නොවන්නේද?

මූලාශ්‍රය - නාසා නිල වෙබ් අඩවිය